كتب/ سمير المراغى
اللي حصل علي الشاشة إمبارح من إعلامي زي عمرو أديب هي مش سقطة مهنية بس بل سقطة أخلاقية ،الدفاع عن الباطل و التدليس و إخفاء الحقيقة و التعدي علي رمز من رموز مصر و شئت أم أبيت فهو رمز غصبٍ عن القناة اللي إنتَ طالع تتكلم منها بأوامر غير قابلة للنقاش مدفوعة الأجر مقدماً شئ وصل إلي حد الإنحطاط
بدايةً من إنك تدخل قصة السواق اللي إنتَ عارف كويس إن تم كشف حقيقتها عن طريق ڤيديو موثق فيه السواق قاعد بيشرب كوباية شاي (مش في الحمام زي ما كدب هو و ابنه) فوق ال٢٠ دقيقة شايف الأستاذ بعينه و قاعد يتفرج عليه و هو واقف تعبان و لسة خارج من العناية المركزة و الفلاشات كلها مضروبة في عينيه بشكل متعمد و زقه بشكل عنيف من بداية خروجه لحد ما راح العربية ،أما عن المشهد العبثي لجري السواق الغير مبرر ورا العربية فدا مالوش تفسير غير انها تمثيلية غبية مدفوعة الأجر
لحد ما قولت عملت إيه و عمرك ما كنت جزء من عمل ضخم زي دا و دا شئ مثير للضحك و الشفقة في نفس الوقت (إنت مصدق اللي بتقوله؟!)
و بعدين أقولك الأستاذ الكبير محمد صبحي عمل إيه؟!
الأستاذ محمد صبحي عمل فارس بلا جواد واللي اتحارب بسببه من جهات إنتَ عارفها كويس و وقف في وشهم واقفة رجل وطني و ما خافش ولا عمره كان خايف من حد زيك كدا
الأستاذ محمد صبحي قلد الرئيس حسني مبارك في مسرحية ماما أمريكا و ما خافش برضو لكن لما طلع يعرض برا مصر ما قلدوش علشان بيحترم بلده و رئيس بلده حتي لو مختلف معاه
الأستاذ محمد صبحي رفض يكون سلعة رخيصة تحت مسمي الترفيه
رفض السيمون فيميه لإنه مصري وطني حر معتز بنفسه و عينيه مليانة
الأستاذ محمد صبحي لم و لن يمسح جوخ في يوم من الأيام
الأستاذ محمد صبحي له أعمال لو قعدت هيئة الترفيه برعاية طال عمره مليون سنة عمرهم ما هيقدروا يعملوا واحد علي عشرة منها
الأستاذ محمد صبحي كان أول فنان يطلع يوبخك قدام الناس علي الهوا في نفس القناة اللي إنتَ طالع فيها تتعدي بالكلام عليه علشان إتأخرتوا عليه و ما هموش حد لإنه إنسان منضبط و بيحترم نفسه قبل أي شئ
نيجي بقي لفيلم الست
الأستاذ لما طلع إتكلم و قال مؤامرة ما شككش في وطنية حد و إنت و اللي مشغلك عارفين دا كويس و كان كلامه واضح و شكر في تلميذته مني زكي (اللي أتمني إنها ما تنساقش ورا الكلام الفارغ اللي إنتَ قولته علشان تزرع الزعل بينها و بين أستاذها) و قال نصاً أنا بلوم علي "تلميذتي و حبيبتي" أن تقع في هذه الوقيعة
و وضح إنه لما يتعرض عليه عمل مخالف للحقيقة هيرفضه (و دا مكانش رأي الأستاذ فقط بل ٩٠٪ من الشعب المصري) و مش محتاجة أقول النقط اللي تم تسليط الضوء عليها في الفيلم و اللي الناس كلها اعترضت عليها و شافت إن دا لا يليق بقيمة ام كلثوم و أم كلثوم لا تختزل في الكلام الفارغ دا
أما كلمة مؤامرة فهي إتحطت في وضعها الصحيح و ما ذكرش أبداً كلمة خيانة ولا مس أي مصري من صناع العمل (شغل رخيص أوي محاولة التوقيع الدنيئة دي)
و علي ذكرك إن فيه مصريين في العمل فإزاي هيعملوا مؤامرة علي نفسهم ؟! طب ما أنا ممكن أورطك ورطة بفيونكة و أحطها تحت مسمي الإبداع و حرية التعبير عن الرأي و اننا هنكون مختلفين و الأوائل في إظهار جوانب محدش شافها و يا ريتها صحيحة أو حتي عالأقل مش بالشكل السخيف اللي إتقدمت به و أغريك بميزانية ضخمة ما تحلمش بيها و أقولك إنتَ هتعمل أعظم فيلم في التاريخ
و الحقيقة إن الأستاذ كان منصف في الكلام كعادته و ذكر عمل زي مسلسل نجيب الريحاني و هو عمل مصري خالص مخلص و قال نصاً أنا مش عايز أعرف نجيب الريحاني رافق مين ولا عاش مع مين ،أنا لما قدمت نجيب الريحاني علشان أكرمه عملت لعبة الست و عملت غزل البنات ،أنا أناقش حياته الفنية ولا أقترب من حياته الأسرية أو حياته العادية ،أنا بشوف معاناته في فنه علشان يقدملنا الفن اللي قدمه ،لكن لا يصح إننا نقدم حياة شخصية لفنان لإن هيبقي فيها الكذب أكتر و أكتر و أكتر (يعني دا رأيه في العموم مش في فيلم الست فقط)
و النقطة بقي الفارقة في الحوار و الهامة جداً عندما تحدث عن الشيفونية و هي تلميع دولة علي حساب حضارة دولة أخري
و الحقيقة إن دا حاصل بقاله فترة (بالفلوس)
و كلام من نوعية السعودية هي منارة الفن في الوطن العربي
والشئ المضحك اللي سموه الأهرامات في هيئة الترفيه و فضل المواطنين يكتبوا مش محتاجين نروح مصر عملنا هرم
و حاجات كتير من هذا الهراء اللي لا يوضع إلا تحت مسمي مؤامرة فعلية و أشياء كتير من هذا القبيل الشعب المصري كله شايفها بعينه بتحصل بقالها سنين
أما عن كلامك إن مالها هيئة الترفيه و إنها جهة إنتاج فقط لا تتدخل في شئ فدا كلام تضحك به علي أي عيل صغير و أكبر دليل الجزء الثالث من فيلم أولاد رزق اللي المفروض فيلم مصري و معمول مخصوص دعاية لهيئة الترفيه بشكل واضح و طلعوا الأهرامات بتاعتهم في لفيلم و طبعاً لازم نقول شعر و نجامل ،ولا دي كمان كانت رغبة المخرج و الممثلين؟!
و بعدين محدش سمع صوتك الجهور ليه لما طال عمره طلع و تعدي علي الأستاذ محمد صبحي بالكلام لمجرد إنه رفض فلوسه و بعدها لما فنان مصري طلع يدافع عن الأستاذ هدده و منع عرض العمل بتاعه اللي من إنتاج شاهد كنوع من أنواع لوي دراع صناع العمل اللي خلوه تاني يوم يعتذر
حقيقي الموضوع وصل لمرحلة تخلينا نخجلك و إن إحنا اللي نقولك عيب
الأستاذ محمد صبحي مش محتاج يغطي علي شئ لإن مفيش شئ أصلاً يغطي عليه
الأستاذ محمد صبحي مش محتاج ينتقم من حد لإنه مش جبان و الإنتقام دا تعرفوه انتوا
الأستاذ محمد صبحي قيمة و قامة مرفوض تماماً إنك تتكلم عنها بهذا الشكل المخجل ليك مش لحد تاني و اللي كلنا كمصريين أحرار نرفضه
و بعدين يا ريت السنة اللي جاية نشوف فيلم لرمز سعودي يتكلم عن حياته الشخصية بكل تفاصيلها و نبعد شوية عن مصر اللي إستغنيته عن مطريبنها و قولتوا مش هيشاركوا في موسم الرياض تاني